Thursday, May 27, 2010

حالة مشى مالهاش نهاية


غريب أوى كل الهوس دا بفعل المشى

انا متعودة انى امشى من زمان...لوحدى...ومن غير اى مشاكل أبداً

جاتلى فترة بطلت امشى فيها ، وكنت خايفة اوى انى امشى فيها ، كنت عايزة كل حاجة تحصل بسرعة من غير تباطوء او هدوء...يمكن عشان كدا كنت باخد تاكسى ان شالله حتى لآخر الشارع

كل الناس اللى حاولت انى ارجع للمشى معاهم ، كانو اختيار خاطئ للغاية..كانو أسوأ الاختيارات فى بعض الأحيان ، لدرجة انى بقيت اخاف امشى مع الناس الصح ، حتى وأنا متأكدة انهم الصح


الأيام دى بقى رجعت له تانى ، ولوحدى تماماً

كنت حاسة ان الطريق دا هو الشئ الوحيد اللى مضمون ، وان البعد اللى بتخلفه كل خطوة بخطيها حقيقى حتى لو كان برتم بطئ


من 3 أيام اخدتها من بيتنا لبيت خالتى مشى ، متخذة أطول طريق ممكن ، مع انى كنت خارجة من البيت مش قادرة أصلب طولى

بس المقاوحة خلتنى بعد نص ساعة ماحسش حتى انى ببدل مابين رجليا الأتنين...أفتكرت فيلم بيفور سانست ، وصورة الشارع اللطيف اللى كانو ماشيين فيه ، أفتكرت انى بحب الشوارع الجانبية دى أوى ، والحوارى النضيفة اللى مرصوفة حجارة كبيرة فيها بلكونات صغيرة حديد ومتزينة بالزرع . حسيت انى عايزة اقضى حياتى ماشية فى الحوارى دى

شوية مزيكا...وأمشى ..أمشى ..أمشى


المهم انى اتحولت من إحساس انى عايزة أهرب باى شكل ، لإحساس انى عايزة امشى طول الوقت


حتى كل الكلام اللى بسمعه من اى حد المفروض انى ماسمعلوش الفترة دى ، بقى كله بيترجم جوايا لجملة واحدة

قومى إمشى دلوقتى ..قومى إمشى حالاً


عشان كدا انا هاقوم أمشى
**********
إتمشوا أكتر هنا
والمزيكا بقى عليكوا

6 شاركونى عالمى:

Zianour said...

طيب والله كويس
انا اهتميت بالبوست ده لاسباب تانية خالص


اصلي برضه بطلة مشي قديمة وبامشي لسه

وطمنتيني انه لسه المشي ممكن في مصر والمنصورة من غير مشاكل وقرف

قولي لي بقى على اسماء الشوارع من فضلك والساعة كام

عشان لماانزل ابقى امشي فيهم

واهلا بيكي لوعايزة تمشي عندي

المشيهنا هيعجبك جدا

:))

Anonymous said...

عمرى ما حبيت المشى مع حد الا مع نفسى...

افروديت said...

عايزه أقولك أن ساات كتيربيكون الأنسان حاسس بأحساس مبسوط أو زعلان فبيمشي من غيرمايحس ..وبصراحه انا بحب امشي جنب البحرلوحدي..بوست جميل

Ahmed Abdelhafiz said...

المشي يحيي الجسد والروح، يدب فيهما بالحياة، ينقيهما من الشوائب المترسبة بفعل "الركنة" ـ

تــسنيـم said...

يوم التلات الجاي حضرتك.. هعمل حسابي في شوز فلات و نقضيها مشي لغاية ما نتلاشى

:)

dandana said...

ام زياد ونور
:)
حلو...المشى دا فعل حياة ممتاز

لا مصر لسا تقدرى تمشى فيها..بس فى الأوقات المناسبة
هاعتبر انك حابة تمشى لوحدك
فأحسن وقت هو مابين الساعة 4.30و7.30
خصوصا دلوقتى فى الربيع يعنى
طبعا فى المنصورة يبقى على الكورنيش بطول المنصورة
وممكن فى المختلط وتوريل القديمة لو بتحبى البيوت بتاعة زمان

فى القاهرة بقى انا ماتمشتش فى اماكن كتير
بس أقدر اقولك ان الزمالك وشوارعها من احسن الأماكن
you can get lost out there with full joy
:D

انتى فين بقى وانا اجيلك يا اوختى ..مدام عندك مكان ينفع للتمشية انا مستعدة


مجهول
كويس..فى احيان كتير
منور


أفروديت
منورة المدونة
والبحر او الكورنيش بصفة عامة..صحبة كويسة


احمد
حقيقى
بعتبره شئ له قدسية وخصوصية كبيرة عندى


تسنيم
والله يابنتى مستعدة
دا مُنى عينى اصلا انى امشيكى على الكورنيش شوية
ويارب الجو يبقى كويس
ان شاء الله