طيب بما ان الست<< تسنيمتى>> مررتلى تاج.... وكمان مسيو مزمز مررلى نفس التاج....وانا اول مرة تحب ياقلبى ويتمررلى تاج....وانا اصلا ماكنتش اعرف ايه هو التاج....فكان الموضوع عويص عويص عليا....خصوصا فى وجود تاج...
قعدت قدام الكومبيوتر...وحاولت افتكر فعلا ايه اللى ممكن مايكونش حد عارفه عنى....صعب الموضوع شوية...لأنى كنت معتبرة نفسى كتاب مفتوح..ومابعرفش اخبى اى حاجة...وبسهولة اوى ممكن اللى قدامى يفهمنى....بس دا بقى كان زمان....
الموضوع احتاج لمج نسكافيه.....
اوكى دلوقت الوضع أتظبط...وهانبدأ فى كشف المستور....
أولا....
أنا مش رومانسية....
كنت ولازلت بعتبر نفسى مش رومانسية أبدآ....ولما بدأت أكتب عن مشاعرى وأورى اللى بكتبه لاصحابى وبعدين يقولولى ايه يابنتى الكلام الرومانتيكى دا كله....كنت بقلهم لا...انا مش رومانسية ولا حاجة.....
ولما كنت بتكلم عن الحب ..او اختار اغنية حلوة اوى اعرفها للكل...او ابتكر تعبير جديد رومانسى وانا بتكلم مع حد...ويقولى<<يارومانسى انت يارومانسى>>...كنت برفض جدا الصفة دى...
يمكن لأنى شايفة إن جانب من جوانب الرومانسية بيبقى ضعف...وأنا مابحبش إني أبقى ضعيفة.....
او يمكن لانى مليانة تناقضات...بس هو مين فينا مش كدا....
ثانيا....
مدونتي الحبيبة دى،كانت فى الأول مشروع فنى شوية...لأنى كنت بحب ارسم جدا...وأوصف حالتى برسمة....لكن للأسف بدأت اكتشف انى مابقتش بعرف ارسم زى الأول...ونسيت حاجات كتير أتعلمتها...وفقدت قدرتى كمان على انى أحس بالألوان....من خمس سنين مارسمتش...ولما رجعت لقلمى الرصاص...ماكنتش راضية عن اللى رسمته...
وفجأة لاقيت نفسى بكتب فى مدونتى...الى أن يحين موعد رسمتى الجاية...هاكتب...
ثالثا....
نفسى أوى يكون عندى مطعم بتاعى....ريستورا-كافيه زى ما بحب أقول عليه دايما...
عشان أنا لما ببقي عايزة اقعد لوحدى فى مكان بعيد مع مج النسكافيه بتاعى وكتاب ، او لما احب انفرد بنفسى وافكر بهدوء..مابلاقيش المكان دا....
عشان كدا عايزة اعمل مكان يكون ليه الخصوصية دى...مكان الواحد يلجأله عشان يبقى مع نفسه...ونفسى اوى اوى اتعلم اعزف بيانو...عشان اعزف فى مطعمى دا....
رابعا....
عندي تردد غير طبيعى....ولا ارادة مستفزة جدا....ودى حاجة مضايقانى جدا....مع ان زى ما احد الاصدقاء كان لسا بيقولى<<مع انه مش باين عليكى>>
يظهر انى بقيت محترفة اوى فى انى اخبى ....
خامسا....
يا جماعة انا بيقولو عليا دمى خفيف....
اه والله....بعرف اهزر يعنى وأبقى لمضة وكل الحاجات دى...مع ان كل كتاباتى على مدونتى عكس كدا خالص...لدرجة ان اصحابى قالولى احنا خايفين لاتروحى مننا يامى....
انا عارفة..انا عيلة جدا من جوة...وطفلة اوى
ومابحبش الكلاكيع والعقد اللى بقت مالية الدنيا وماليانى دى عشان كدا انا شغالة على مشروع مدونة ترفيهية طفولية مضحكة بحتة....
وادعولى.....
اوكى....جت بقى اللحظة الممتعة...اختار انا بقى....
هيييييييييييه.....
تسنيم فلتت ودبستنى......
ادبس انا...حد يناولنى الدباسااااااااااااااااااااا
تك
حنين الجميلة....
تتك
شيماء...صريحة مش خنقةتك تك
ابن مر...ويارب مايطنش...
تكتك
سوستى....فقاعة الهوا العسل...
تشك
ضيوءة...ابو عقل جميل...
و الى هنا ينتهى تاجنا لهذا اليوم.....شكرا لأستمتاعكم....
للمزيد...اطلبنا على زيرو زيرو مافيش اطلب ماتلاقيش...
مش بقول عيلة....
4 شاركونى عالمى:
ماشى ماشى
تانى واحدة تفرقع فيا البومبه دى بعد دينا فهمى
حاضر من عنيا بس يا رب اعرف اكتبه
قبلاتشى يا جميلة
يا باشمهندزة مي إنتي خدتي تاج واحد ليه؟
أنا باعت لسيادتك تاجين
والتاج الأولاني أهم والذ
روحي خديه بقى مش هتنازل ولا هرضى بأقل من التاجين فوق بعض
ورحم الله أمل دنقل
سيقولون
ها أنت تطلب ثأرا يطول
فخذ الآن ما تستطيع
بعضا من الحق
في هذه السنوات القليلة
إنه ليس ثأرك وحدك
لكنه ثأر جيل فجيل
نياهاهاههه
هاهاهاي .. أينعم يا جميل في غيري دبسك فيه بس أنا التدبيسة الأولى.. كان إييه شعورك لما دخلتي عندي لقيتي إسمك منور كشف المتدبسين؟؟
هرجع تاني علشان باص الشركة هيفوتني.
محبتي وقبلاتي
شيماء.....
معلش بقى دى اول مرة من نفسى...
اعمل ايييييييييييه....
كلك بركة يابنتى....
معاذ....
انا باشمهاندسة.....
لولولولولولولوىىىىىىىىىى....
ودا امتى حصل ...والله ماكان عندى ايوها خبر....
حاضر...بس سيبنى افوقله وهاعمل بوست مخصوص ايه....
وبعدين
مع احترامى لاحمد مطر الحبيب
ثأر ايه اللى انت جى تقول ليه....
انت شرير لى فكرة....
تسنيمتى....
يارب الباص يكون فاتك عشان دبستينى...
عقبالى بقى يارب لما افوت باص اى شركة ....
Post a Comment