Wednesday, January 4, 2012

اجزاء شاردة من رسالة جديدة لموضوع قديم


...احيانا-

ماتبقاش المشكلة ف انى احكى تفاصيل على قد ماهى انى مش عارفة احدد الغلط فين بالظبط . ولا ليه مثلا الوضع السئ دا يبدأ فجأة مدام كنا ماشيين كويس .

فكرة ان الحاجة تبدأ فجأة كدا دى فكرة شخيفة بالنسبة لى وبحس ان الكلام فيها بيسخفنى انا شخصيا ، بس للأسف فى الغالب الأمور بتخرج عن السيطرة بنفس السرعة اللى بدأت بيها ، والخساير بتبقى كبيرة وعميقة .

فى الحالة دى يمكن حتى الدعوة بان ربنا يهدّى الأمور مابتكونش مُجدية ؛ على الاقل بالنسبة لى . لأن فيه حاجات فعلا لما بتنكسر مابتتصلحش ، والغباء بقى اننا نضحك على نفسنا بوهم الصُلح / التصليح . المفروض نوفر الطاقة اللى بنبذلها فى الوهم دا للطريق الشائك و المؤلم اللى هايوصلنا لنقطة التعود وبعدين اللامبالاة باللى يحصل تانى ، ويمكن نقدر فى لحظة ما نبعد تماما ونبدأ من جديد فعلا ؛ حتى لو كنا مهترئين تماما .

ع العموم ..انا مش عارفة اخرج برا الوهم دا لسا ، مع انى عارفة انه وهم خلاص .


التاريخ بيعيد نفسه تماما معايا ، واليومين السود اللى انا عايشاهم دول كانو برضو من اسود ايام حياتى فى نهايات 2010 وبدايات 2011 . مدعاة للسخرية ..صح؟


بعد قراية الكلام دا تانى ..مش مصدقة انى بتفلسف على المشاكل-

واللى مش مصدقاه ابدا انى كتبت جملة "مدعاة للسخرية" دى.. انا حتى ماعرفش هى صح ولا غلط كدا

:D


حاسة انى بمثل حلقة فى سيت كوم-


6 شاركونى عالمى:

Esraa Fehead said...

أنا مبسوط
مبسوط من ايه؟
ان حبنا أقوى من كل حاجة أقوى من المشاكل ومن الزعل ومن كل حاجة بتعدي علينا
في حاجات بتجرح اوي لكن في حاجات تانية أقوى من الجرح
أتمنى إن ربنا يصلح الأحوال

Timo.. said...

كل ما الدنيا بتسود..
كل ما النور بيكون اقوى..
والاهم..
كل ما بنحس بقيمته وبنقول الحمد لله من قلبنا

حلوة التدوينة دي بس محتاج اتعمق عندك اكتر لاني شايف تدوينات من 2006
وانا باحترم الناس اللي بتدون من زمان كده :)

أه..على فكرة
حلوة "مدعاة للسخرية" مش وحشة

(';')

Timo.. said...

ممكن نتفق انك تكبري حجم الخط شوية عشان عيني وجعتني..؟؟
ممكن..؟؟
ممكن..؟؟

dandana said...

يارب يا روؤة
يااارب


تيمو
ممكن ممكن
انا والله كنت مكبراه ورجعت صغرته تانى
بس خلاص لو جيت تانى هاتلاقيه اكبر

وتعمق بقى براحتك
:)

Timo.. said...

جيت..
ولقيت..
الخط صغير برضه..!!

انا لو اعرف طريقة تخليني اعلق بخط صغير كنت خليتك تعرفي الفرق :(

dandana said...

انا والله حاولت اكبره اكتر
بس مش راضى

هاحاول بقى من البوست الجاى