جاى على بالى اقوم حالا من مكانى ...واتنطط...وارقص...واعمل حركات مجنونة...واغنى بصوت عالى...واعمل هيصة وهوليلة...من غير ماتكسف
جاى على بالى امشى لوحدى ساعة الفجرية من غير خوف...اسرح...افكر....ادندن...اتامل شروق الشمس حبيبتى...تملانى دفا...ونتصاحب ...واتفق معاها انى كل يوم هاصبح عليها...وهاكون اول واحدة تشوفها
جاى على بالى انزل الشارع واجرى مع العيال اللى بتلعب برة دلوقت...واروح معاهم فى جنينتهم الصغيرة استغماية ونط الحبل...واتخانق معاهم مين يركب المرجيحة الاول...وارجع اخر اليوم هدومى مليانة تراب...ومايهمنيش
جاى على بالى اعمل مغامرتى الخاصة ....ومغامرتى بالنسبالى انى اسافر اليكس ..واقضى اسبوع كامل فى مكتبتها الجميلة...انام واصحى على صورة الكتب وريحة الحبر على الورق وعبق الكتب القديمة....اقضى اليوم فى ايدى كتاب وفى الايد التانية مج نسكافيه...من غير ما حد يزعجنى....silent please
جاى على بالى اسمع <<حبيتك>> لفيروز جبيبتى...
وجاى على بالى اضحك من قلبى...من جوا جوا قلبى...
6 شاركونى عالمى:
"أنا سيميائي..لأني تعلمت هذا من اسلافي الذين تعلموه من أسلافهم وهكذا منذ كان العالم...وفي ذلك الوقت كان من الممكن تدوين كل"العمل الكبير"-صناعةحجر الفلاسفة وأكسير الحياة-على زمردة صغيرة وكن الناس لم يولوا أهمية للأشياء الصغيرة..فبدأوا يكتبون الرسائل والشروحودراسات الفلسفة..وبدأوا أيضا يتظاهرون بأنهم يعرفون الطريق أفضل مما يعرفه الآخرون!!!"
من رواية السيميائي-ساحر الصحراء-باولو كويليو
انا جاي علي بالي اجي اعمل معاكي كل الحاجات الحلوة اللي بتتمني تعمليها دي
اروح معاكي اليكس بس بلاش ريحة الحبر و الكتب بتتعبني من ايام الجامعة
انا اروح المنتزة ابلبط و انتي روحي مكتبة الاسكندرية و نتقابل عند الصفواني نضرب لنا كيلو كباب و كفتة
قلتي اية؟
--
امنياتك رشيقة و بريئة
و اكيد انت ارق من رقة كلماتك
---
ابن مر
منجيلكش في حاجة وحشة
و ربنا يزيح عنك
تخيلات رائعه وجميله وطفوليه ما احلي الرجوع اليها
ابن مر
شكرا على المداخلة بس بصراحة ماوصلنيش قصدك تماما
كلبوزة...
وانا جاى على بالى اخدك ونعمل كل اللى فى نفسنا برضو....
واوكى ياستى روحى المنتزه ونتقابل عند بتاع الكباب...بس ماتنسيش السلطات بليز
مرسى على كلامك الجميل فيا
محمد مفيد...
مبسوطة انها عجبتك..
انا فعلا بستمتع وانا بفكر فيها...فما بالك بقى لو اتعملت بجد
مش عارف أنا شكلي كده رجعت لدائي القديم بتاع التعقيد
الفكرة ان كل أسرار العالم من ساعدة وفرح وخير وشّر موجودة في الحاجات البسيطة اللي بتعملها القلوب البريئة الصادقة
وآسف للتعقيد
اهااااااااااااا
كدا فهمت
والله كلامك صح
Post a Comment