Tuesday, November 14, 2006

ملاية لف


يااااه

يا ام الملاية اللف...

من زمان ماشوفتكيش...

ولا سمعتش صوت خلخالك...

اللى بيخلى

كل العيون بصالك....

ماشية تتمخترى على مهلك...

وكان غيرك فى الدنيا مافيش...


****************

الكلام دا والله اول حاجة جت على بالى اول ما شوفتها

ام الملاية اللف...

انا ماصدقتش عنيا ساعتها...لولا بس ان كان معايا صاحبتى وهيا كمان اخدت بالها وشاورتلى عليها كان ممكن اطلع على اقرب دكتور واقوله الحقنى...انا بهلوس

بس الحمد لله ماطلعتش بهلوس ...

كان نفسى اوى يبقى معاياي كاميرا عشان اصورها ويبقى اثبات انى شوفت واحدة ماشية فى الشارع بملاية لف....وامتى؟دلوقت فى الزمن اللى احنا عايشيين فيه دا...

بصراحة انا مش عارفة هى كانت قصداها عشان تلفت الانتباه يعنى ...ولا هى متعودة تخرج كدا...ولا يمكن ممثلة لابسة للدور...الله اعلم....اصل المنظر كان غريب قوى وبالعقل كدا مين بقى اللى هايسيب البطلونات والبديهات والبانتاكورات والمينى والميكرو...عشان يلف نفسه بملاية...اصل بيتهيالى ان الموضة دى انقرضت خلاص


بس بصراحة برضو على قد ما المنظر كان غريب ...بس كان جميل ...انا حسيت انى مستمتعة جدا وانا بشوف حاجة ماشوفتهاش غير فى الافلام القديمة وبس...حسيت انى ماشية فى سيدى بشر فى اسكندرية سنة 30 ...

وفرق كبير اوى انى اشوف المنظر فى فيلم وانى اشوفه على الحقيقة...

احساس تانى خالص...


اااااخ بس لو كان فيه كاميرا

2 شاركونى عالمى:

ابن مرّ said...

انتي عاميّتك جميلة قوي في الشعر عارفة...أجمل حاجة انها صادقة مش بتترسم ولا بتتزوق
بس بجد موضوع الملاية واليشمك؟؟؟؟؟؟؟؟
يااه أنا عمري ما شفت حد كده متهيألي لو شفتها كنت حاروح أصبح وأقولها نهارك سعيد !!!!!!!!!!!!!!!!!

dandana said...

مرسى على الكلام الجميل

انا كمان كان نفسى اكلمها

بس تقدر تقول الدهشة خلتنى وقفت فى مكانى وبس