Friday, July 16, 2010

فرصة كاملة

انا بحب الرسم أوى
وبحب اى لوحة اترسمت...حتى لو اكتشفت بعد كدا انها مش عاجبانى اصلا
بس للوهلة الأولى..هاتخلينى اقف قدامها لمجرد انها لوحة
اول ما فكرت انى اعمل المدونة دى كانت لانى كنت مهووسة جدا بفكرة الحيطان وقدرتها على انها تشيل اى لوحة كهما كانت
كنت بدأت اشوف لوحات جدارية كتير..وحلمت انى قدرت الاقى جدار طويل اوى...وبدأت فعلا أرسم
كان شئ عظيم
مع انى فضلت مامسكش اى قلم ولا ورقة عشان أرسم مدة كبيرة جدا..بس برضو دا ماكنش بيمنع انى بنجذب لأى شئ مرسوم
كانت فترة وحشة اوى
من شهرين تلاتة بدأت احس قد إيه الواحد ممكن يكون عنده شئ حلو ومميز وهو اللى يفرط فيه..كنت مستصعباها اوى،ومش لاقيالها حل
كنت بدأت خلاص اتكسف اقول انا بعرف أرسم..لانى ببساطة ماكنش عندى اى إثبات على كدا حتى قدام نفسى ..كل سنة رسمة..إيه الخيبة دى
بس مانكرش ان الرسم هو اللى خلانى آخد بالى من حاجات كتير اوى..وأحبها..وبعدين الاقيها مُتعلقة بيه
البيوت والمعمار .. التصوير .. الديكور وخصوصا اللى معتمد على أرابيسك
كنت كأنى بعوض قلة رسمى وإهمالى بأنى اهتم بالحاجات دى كلها
لما شوفت واحد بيرسم بالرمل..إتجننت..الفيديو دا مشهور اوى..وكان له وقع مش طبيعى جوايا
زيه زيى عمر خيرت او فيروز او إيمان مالكى او المنسى قنديل اول ماعرفتهم..كلهم خلونى أسأل ياترى إيه احساس اى حد منهم وهما ماشيين فى الشارع وعارفين انهم مُتفردين كدا...وبيعملو حاجة ماحدش بيعملها غيرهم؟
برضو ساعتها كان سؤالى اللى بيقتلنى..طب ولو الرسم هو وسيلة تفردك..هاتعملى إيه بقى وانتى سايباه كدا..وهاتعرفى منين أساسا إذا كان هو ولا لأ...؟
لحد دلوقتى يمكن مافيش إجابة للسؤال دا
بس لما لاقيت قدامى فرصة انى أنضم لورشة رسم..اكيد كان لازم اروح لها زى المنومة
فرحة حقيقية وانا قاعدة هناك..وبحاول آدى نفسى الفرصة الكاملة للإكتشاف من غير اى بتر وبإختيارى التام..زى ما اتمنيت فى يوم
حتى لو ماطلعش الرسم هو سر تفردى...على الاقل هاكون اخدت فرصة للنهاية..وهارتاح جدا بعدها


الرسمة..أول لوحى الكاملة فى الورشة

10 شاركونى عالمى:

آيــة said...

بتعرفي ترسمي يا ميويتي
:))

prince of silence said...

agree

Unknown said...

كم وسائل التفُرد التى تمتلكينها يُذهلنى يوما عن يوم :)
احساسى للصورة اول مرة اشوفها انها مش بتاعت حد هاوى
بس اجمل ما فى الموضوع انك قررتى تمشى فى طريق يمكن يكون طريق تفرُدك.. وحتى لو مش طلع هو هتكونى مرتاحه لانك أخدتى خطوه بكل تأكيد هى صح

mado

رحــــيـل said...

:)

جميل ان نفضل ورا الحاجة اللى بنحبها لحد ما نعملها مش مهم كل الوقت اللى فات
المهم اللى جاى
انا بحس انها عملية توحد مع الحاجة اللى بنحبها وبنعملها
الحالة نفسها والاحساس بأن الحاجة دى بتسببلك نشوى وسعادة ده المهم اكتر من فكرة التفرد بيها
فى كل الاحوال انتى مش خسرانة بالعكس زى ماانتى قولتى فرصه كامله للاستمتاع كمان

يمامة شاردة said...

حلوة الصورة..

و حلوة الخطوة الجديدة..

و حلو التمبليت الجديد

:)

ابتسامة حزن said...

والله بجد الرسمه حلوه يامي استمري

dandana said...

أيوش

والله يابنتى نورك غطى على اى حاجة تانية
اخيرا جيتى بعد غياب


امير الصمت
:)


مادو
:)
مش كدا برضو
انا حاسة كدا
منور
:)


سارة
نشوة رائعة لما بخلص لوحة
نشوة اروع لما بكون لسا برسم
بيتهيألى انا كنت مفتقدة الإحساس دا



يمامة
:)
مش عارفة اقول إيه
بس مبسوطة
ممتنة


ابتسامة
تسلميلى
شوفتى المواهب
:D

احمد أبو العلا said...

حقيقى رسمك حلو وفيه عناية بالتفاصيل وأتمنى تستمرى وتبدأى ترسمى مشاعر وأحاسيس أنا أظن أنك تتمتعين بالكثير منها ما يستحق التعبير عنه
وأدعوك لزيارة مدونتى
http://www.7arfwaw.blogspot.com/

satoo said...

الرسم ده من مخيلتك
ولا حاطه شيء قدامك وبتتملي منه بعيونك
ربنا يوفقك رسم جميل
للامام ان شاء الله

Muhamad Abdulghany said...

عندك حق مجرد ما تفكرى ان الرسمه دى جزء من عالم حد معين وانه رسم العالم بتاعه ده بريشته , حتى لو اللوحه مش عاجباكى بتاخدى وقت عشان تعرفى كان بيفكر فايه وهوه بيرسمها