Saturday, June 20, 2009

البداية الوحيدة لشئ جديد



كانت أول مرة أبص فيها لورا و أنا ماشية




لما قابلتك يوم أربع بعد أتصال مش متوقع منك أبدآ،وافقت بعده _بصوت مهزوز_ انى أشوفك،وفعلا حصل..أتقابلنا..وأتكلمنا كتير..يمكن أكتر من المتوقع،والغريب أننا مشينا فى شوارع كتير حلمت قبل كدا انى بمشى معاك فيها..من 3 سنين


ماقدرتش أقولك ع الفكرة دى




قولتلى كتير أنى لسا زى ما أنا،وانى ماتغيرتش ابدآ،وأنا خوفت أوى اصدمك بالتغيير اللى حصل ليا،فرجعت بيا عشانك_3 سنين


بس أنا لسا عنيدة..لو ماتغيرش فيا حاجة واحدة بس..هاتبقى عندى




ماكنتش خايفة وأنا ماشية جنبك_عمرى ما خفت وأنا ماشية جنبك،بس النهاردة ماكنتش خايفة آخر حاجة. ايه يعنى لما أى حد من اللى المفروض مايشوفناش مع بعض عشان هايفتكر أننا رجعنا لبعض،وأكيد هاينشر الخبر بسرعة أوى،يشوفنا تانى مرة كمان بعد 3 سنين




على فكرة..أنت حطتنى فى زاوية الكلام كتير أوى_حقيقى حقيقى ماكنتش عارفة أتصرف،وكنت بتحرك بصعوبة لما أنت بس تاخدنى بالكلام...لزاوية تانية


انت أكيد ماكنتش واخد بالك،والا كان زمانك فرمــــ....لأ لأ لأ ،ماكنتش هاتفرمنى :) ..لسا لحد دلوقتى مابهونش عليك




عارف..الوجع اللى كان فى دايرة قربك،كان غير محتمل..وجعى،ووجعك اللى بدأ يظهر أوى بعد ساعتين مشحونين كلام،وفضل يزيد يزيد يزيد لغاية ما جه وقت الفراق التانى




حقيقى كنت عايزة أمسك ايديك اللى هافضل طول عمرى أسأل نفسى ملمسها ايه،وأطبطب عليها انى متأسفة..أوى




آخر نظرة ليا ماقدرش أديها وصف حقيقى،بس أنا اديتك ضهرى بسرعة بعد مع السلامة زى ما بعمل دايما وقت الهروب




لما روحت البيت_وعشان الهروب يكمل..نمت،وأكيد كان لازم أحلم بيك..فى الحلم؛قولتلى فى نهاية نهارنا مع بعض ممكن حضن قبل ما تمشى




صحيت بروح مهجورة،وأفتكرت لما بصيت عليك من ورا كتفى وشوفتك وأنت ماشى...مبنى قديم مهدود




كانت أول مرة أبص فيها لورا وأنا ماشية،ومن يومها مابطلتش أبص لورا

12 شاركونى عالمى:

esraa said...

:(

maioya said...

عجبني اوي توظيف العاميه
شنيعه بجد

dandana said...

أسراء
sorry tany
بس توقعى حاجات من دى كتير اليومين الجايين بقى

ميوية
مرسى يا فندم
شنيعة دى يعنى مرحلة متقدمة من الحلاوة
زى ما ضياء قالى ع الفيس بوك مجرمة
:)

صدفة جميلة said...

السلام عليكم
مكنتش خايفه اخر حاجه ههههههههههه
وخداها من فيلم حماده هلال ماشى بس نصيحه مابصيش لورا تانى لانك ممكن توقعى وربنا يستر
ساعتها هايكون شكلك وحش اخر حاجه والناس كلها هاتبص ليكى وتقول بتصعب
ياحول العالم ههههههههههههههههههه

صدفة جميلة said...

انا مستنى تزورى مدونتى وتضحكى عليها لانها نحفه من متحف الشمع وحشه اخر حاجه لكن بعد زيارتك ممكن تتحسن منتظر رد الزياره

dandana said...

صدفة جميلة
طيب هو فعلا أنا ماشوفتش فيلم حمادة هلال اللى بتتكلم/ى عنه
بس أهى صدفة جميلة..أنا بحب حمادة
والبص لورا مفيد أحيانا
حتى لو كان الطبيعى والاحسن البص لقدام

نورت

صدفة جميلة said...

ياستى نبص ورى قدام انا منك زعلان كنت مستنى زيارتك لكن للاسف على العموم علشان اسمك هاجى وعلق يعنى بعد اذنك
بس لوزورتينى اكيد هاكون سعيد ومدونتى هاتخرج من توب الاحزان ولكى منى كل سلام

moony said...

طب ليه مش ممكن القصة الشجية دى تكمل؟؟؟
ليه مانطاوعش قلبنا ونداوى الوجع؟؟
حاسه انكوا تقدروا على ده...
وحاسة ان الوجع ده هيفضل موجود اذا فضلتوا بُعاد...
تمنياتى لكى بكل الخير والدفء..

moony said...

مى .. نسيت اقولك انه بوست حقيقى قووووى ومسنى قوووووووووى رغم انى مامرتش بنفس التجربة .. بس حاسة بصدقه قوووى.
بوست جميييييييل جدااااا رغم أنه يوجع جدااااا..تحياتى وطبطبة من قلب شعر بك جدااا

dandana said...

موونى
مرسى حقيقى ع الطبطبة

بتهيألى لو كانو قدروا يرجعوا ماكنوش ضيعوا وقت

احيانا بتبقى الرغبة موجودة بس الطريق مش واضح
فالناس بتوه من بعض

سعيدة بتعليقك دا
ومعلش أتأخرت
من زمان ماكنتش جيت هنا

3mr wa2el said...

اسمحيلي عزيزتي انتوا عامة كبنات واء مبتحسوش بقيمة اى حاجة الا لما تروح الى بيحب بيحافظ على الى بيحبها و بيحطها بين رموش عيونة دة الى بيحب و انتوا القلق و الخوف بتضيعوا كل حاجة تسلم ايدك على كلامك و كلام حلو و جميل الا الامام

ابتسامة حزن said...

احاسيس جميله يامى

عجبنى اوى حكايه الهروب عن طريقالنوم دى بتحصل معايا كتير
ويستى لما يجيلك فى الحلم ابقى اعملى كل اللى معرفتيش تعمليه فى الحقيقه
كده محدش يقدر يلومك ولا يتكلم عليكى