Monday, June 15, 2009

عن الحلم


من فترة بعيدة نوعا ما،كنت بستجدى الاحلام انها تزورنى وانا نايمة،ماكنتش بحلم لدرجة انى كنت بصحى وبحس انى جافة اوى ..زى صحرا


المشكلة ما انتهتش ابدا..لكن ماقدرش انكر ان الاحلام احيانا بتحب تصالح نومى زى ما هى مصالحة يقظتى على طول..ممم،طيب هو أنا ماقدرش اقول عليها مصالحة بالظبط،لأنها احيانا كتير بتخضنى فعلا..


زى الاسبوع اللى فات مثلا،لما حلمت ان واحد قريبى،وهو احد اصدقاء طفولتى وبيلعب دور مهم فى حياتى لغاية دلوقت،حلمت انه مات

مات من غير ما أشوفه_وأنا اصلا فى الحقيقة بقالى مثلا 4 شهور ماشوفتوش بسبب بعد المسافة بعد ما نقلنا المنصورة نهائيا_كان احساس صعب انى اتاخد على خوانة كدا،يعنى تقريبا فى الحلم كان كل حد عارف الا أنا

طبعا صدمتى من موته ماتتحكيش..بس كنت كمان مضايقة منه أوى،وطول ما أنا رايحة لبيته كلمة واحدة بس بتتردد جوايا

ازاى يموت من غير ما يقولى


الاحلام اللى من النوع دا بتهز دنيتى فترة طويلة أوى،مابعرفش اتعامل معاها،بحس بذنب كبير ناحية اللى بحلم بيه،وبفضل اتمنى انى احضنهم وأفضل أعتذر أعتذر أعتذر


أخر مرة حلمت بيها بالموت_قبل الحلم دا_كانت من سنة ونص تقريبا..وبعد ما صحيت فضلت فكرة الموت مسيطرة عليا وقت طويل أوى

كنت معتقدة انى انا اللى هاموت..على أساس ان الواحد بيبقى حاسس قبلها بأربعين يوم_وأنا لحد دلوقت ماعرفش الفكرة دى صحيحة ولا خزعبلات_ومع انى ماكنتش خايفة بس كنت بدأت احضر نفسى انى فى اى وقت هاقابل ملاك الموت..ف مش لازم اتخض


بعد الحلم دا بشهر تقريبا_لما الموت أخد جدى رابع يوم العيد الصغير ، كانت أول حاجة عملتها بعد الدفنة أنى صليت ركعتين قضاء حاجة انه مهما حصل مهما حصل يارب..بلاش احس بالموت قريب أوى كدا تانى_أتفاجأ بيه يمكن يكون أهون


الحلم اللى ماقدرتش آخد موقف منه، كان كل فترة بيفوقنى على حقيقة انه مش دايما ناعم زى وقع الكلمة عليا_واللى من حبى فيه فكرت أسمى بنت من بناتى حلم_ولا لطيف زى تشكيلة ال3 حروف بتوع الكلمة


بس كان بيعرف يصالحنى أزاى،زى المرة اللى جابلى فيها جدى بعد سنة ونص من وفاته ماكنتش عارفة اتغلب فيهم على فكرة انى هازور بيته الكبير من غير مايكون قاعد فى الفاراندا بيشرب شايه التقيل وبشرته السمرا النقية بتلمع من بعيد_الحلم عرف يصالحنى لما شوفت جدى راضى،مطمن،وبهى اوى..زى ما كان موجود فى الحياة وأحسن


الحلم بيعرف يصالحنى وبيعرف يقسى عليا ،ويوجعنى جدآ،ويعمل فيا الاعاجيب..عشان يصالحنى تانى


بستسلم ليه..وباستعين على تلاعبه بيا بقدرتى على الرسم والتلوين

8 شاركونى عالمى:

تــسنيـم said...

أمــا أنا هذه الأيام فأحلامي تتآمر ضدي :(

تسمح لكل من أسقطتهم من حساباتي وأبعدتهم عن عالمي أن يحتلوها



أنا أتمنى ألا أنام لأحلم.. وبجد

دنيتى الجميله said...

السلام عليكم ورحمه الله وبركاته
عارفه اصعب شىء فى موضوع الاحلام ايه
لما ولادى يقوموا من النوم مفزوع وبيعيط بدون توقف علشان حلم بشىء مخيف
ربنا يحفظنا من الاحلام اللى بالشكل ده

esraa said...

ازاى يموت من غير ما يقولى

وجعتني اويييييي

dandana said...

تسنيم
ماهو دا التلاعب اللى بجد

شئ محير


دنيتها
قلب الأم بقى

ربنا يحفظهم ليكى



اسراء

:(

مصطفى السيد سمير said...

انتي فنانة يا بنت
والموضوع دة مؤذي جدا
عشان الفنان عنده قلب بيحس جدا


عجبني قوي اسم حلم دة
ممكن لو جبت بنت اسميها حلم
:))

dandana said...

باين كدا


وبعديييين

مش معنى انه عجبك انه بقى مشاع بقى

دا اكسكلوسف لو سمحت
فكرلك فى اسم تانى
:)

the girl in the mirror said...

بوست حلو أوى :(
و فعلا ازاى يموت من غير ما يقولى موجعه جدا

dandana said...

:(