Thursday, December 6, 2007

انا...مضايقة..مننا


ماسج وصلتنى ع الفيس بوك

************************************
السلام عليكم ورحمة الله وبركاته

الموضوع باختصار مصيبة استفحلت وبقي لازم علاجها

وهيا مسج وصلني منها الكثير والكثير من اكثر من شخص مختلف

وأعتقد انها وصلت لملايين المسلمين

ولو انتشر الموضوع أكثر من ذلك

لحدث ما لايحمد عقباه من فتنة طائفية وأحداث دامية

خصوصاً وأن الناشر لا يمت للإسلام بصلة وأكاد أجزم أنه يهودي أو أمريكي والله أعلم

والمسلمين هم الذين يقومون بإعادة الإرسال بالاف الرسائل في الساعة

تابع معي الرسالة وهتفهم المغزى


القرآن ممنوع في هولندا والمسلمين يرفعون شكوى والحكومه تصدر تصويت

وللأسف الإنتصار لحد الآن لهم

43%
مقابل 57% لهم

لاتخذلو كتاب الله

صوت يا مسلم للقرآن
وساعدو على نشرها للجميع لنصره الاسلام والقران الكريم
و أنشر تؤجر
http://www.stand.nl/index.php

وصلتني الرسالة دي من أكثر من شخص

ووجدتها بالملايين علي الايميلات والفيس بوك

وبالفعل استفزني جداً الموضوع كمسلم

وقمت بالدخول علي الموقع للتصويت لصالح القرآن

ولكني فوجئت بالموقع كله باللغة الهولندية

dutch

وقرأت الجملة فلم أجد كلمة تصلح أن تكون كلمة قرأن

وهاهي الجملة لتقرؤها

Het is goed als het kabinet besluit tot verlenging van de missie in Uruzgan

een (green colour) oneen (red colour)


فدفعني الفضول للبحث عن الترجمة

وكانت كالآتي

هل توافق علي رأي الحكومة في مد خدمة قوات حفظ السلام في أفغانستان أو لا توافق

een = agree oneen = disagree

ايه رأيك؟؟؟

مهزلة؟؟؟ صح؟؟

ده طبعاً يعبر عن مدي استخفاف مخترع الرسالة الأول العبقري

اللي ربنا هيحرقه في نار جهنم

عشان بيكذب علي الله ورسوله

يعبر عن مدي استخفاف شعوب العالم بالمسلمين

ووصفهم لينا بالجهل فعلاً

وطبعاً ده استكمال لمسلسل

لقد رأي فلان في المنام رؤية وصلها ل 13 وهتسمع خبر حلو كمان13 يوم

او الرسالة الشهيرة اللي بتبعت من 5 سنين ومازالت بتوصلي

لقد رأي الشيخ أحمد حامل مفاتيح الحرم النبوي النبي عليه أفضل الصلاة والسلام في المنام وأبلغه ما يلي

وتلاقي كلام كتير بعد كدة

طيب سؤال

لو فرضنا ان الكلام صح هل يعقل ان مفاتيح الحرم النبوي اللي مش عارف له كام باب حتي الان

بإيد شخص واحد ؟؟؟؟؟؟؟؟

والشخص دا فاضي يقعد علي الفيس بوك يعمل شات؟؟؟

ولا قال الرسالة لابنه وقاله ابعتها علي الفيس بوك؟؟؟

او علي الايميل؟؟؟؟

وتفتح رسالة تانية تلاقيها مكتوب فيها أقسم بالله العظيم اني هبعتها لكل اللي عندي

ويقولك بعدها انتا اقسمت اهو

ابعت بقي كلامي

هوا في ايه ؟؟

للدرجة دي بقي يضرب بينا المثل بالتخلف؟؟

الموضوع سياسي بحت ولا يمت للدين بصلة

بل علي العكس انا شايف من وجهة نظر شخصية ان قوات حفظ السلام في افغانستان بتساهم في منع النهب الامريكي لثروات المسلمين

جرالكوا ايه يا جماعة؟؟؟

الرسالة وصلتني من طلبة صيدلة وهندسة وطب !!!!!!!

ولزمايلي ولكل المثقفين اللي بيستخدموا النت بقول عيب

ولزمايلي خصوصاً

بقول عيب قوي

دا احنا طلبة صيدلة؟؟؟ مش معهد فني صحي لوالب

هتقول انتا مزودها يا كريم

هقولك والله ابداً

انا بس الموضوع مادخلش في دماغي

وحبيت اتأكد

وعايز اقولكوا الناس بتوع امريكا او اسرائيل طبعاً اللي في مصلحتهم ان قوات حفظ السلام تمشي

الناس دي صيع يا جماعة !!! والله صيع

شوف الدماغ اللي دارسة نفسية المسلمين؟؟؟

للدرجة دي الناس دي فهمينا وبيعرفوا يوجهونا علي مزاجهم وكمان بيستغلوا اشرف كلام في اغراض سياسية؟؟؟


الأول استغلوا السب وسيلة لتهييج المشاعر واحداث الفتن

لقوها مش حلوة قوي

قالك نستغل المسلمين وانتمائهم القوي لدينهم في تحديد القرارات المصيرية للدول التانية

اللي احنا عايزينها تحصل نقولهم بيقولوا القران حلو ولا وحش؟؟؟

فالناس تقول حلو

واللي مش عايزينها تحصل

نقول خلي بالكوا القران هيحظر ؟؟؟؟؟؟

فالناس تقول لأ

وكل الكلام ده طبعاً بلغات

نادرة علي مجتمعنا

لا هي انجليزي ولا فرنساوي

هولندي !!!!!!!!!!!!!

بجد عيب

اقسم بالله انا لو كان الكلام ده فعلا عن القرآن انا ما كنت قلت كلمة واحدة بل وكنت نشرت الرسالة دي

لكن الموضوع فعلاً مستفز لأن في ملايين الرسايل انبعتت من النسخة دي

والموضوع دا ممكن يؤدي لفتنة احنا في غني عنها

كل يوم حد يطلع يشتم الإسلام ويجري

وإحنا يا مسلمين عاملين زي واحد تخين جداً وعملاق واحد فسل صغير ينط يضربه علي قفاه ويطلع يجري

فالتخين يجري وراه

لا هوا حصله وفعصه

ولا هوا استريح

بيجري وخلاص
!!!!!!!!!!!!!!!!


وبردوا مضمون الرسالة ركيك لغوياً

يعني ايه حظرالقرآن؟؟؟؟

مش فاهم يعني؟؟؟

اللي معاه قرآن هيتقبض عليه ؟؟؟ ولا هيجبروا المسلمين يصلوا من غير قرآن

موضوع زي ده لو كان صح كانت الدنيا هتقوم

مش مجرد مسج علي الفيس بوك والياهو والهوت ميل

وعايز ابشركوا

علي فكرة يا جماعة

الناس دي نجحت

ونسبت عدم الموافقة اللي هما عايزينها بقت 51% مش موافقين علي بقاء قوات حفظ السلام في افغانستان

بدل ما كانت في الأول 43%

واللي نجح الموضوع ده المسلمين

الله

برافو يا جماعة

انا شايف اننا مفروض زي ما نشرناها للناس كلها ننشر الترجمة

وكفاية بقي تهزيق وقلة قيمة

بلا قرف

كريم فايد
الفرقة الثالثة صيدلة الإسكندرية
الإسكندرية في 25/11/2007 الساعة 2 صباحاً





10 شاركونى عالمى:

السـيد شبـل said...

اولا:
دى مدونة مى ... صح!
اما كرين فده بيكتب موضوع ...
مظبوظ كده
اذن فالكلام اولا لكريم:
موضوعك هايل.. وانت عندك حق فى كل كلمه قلتها... خاصة انك حاسس ان اللى ورا الموضوع ده صهاينه وامريكان..

عندك حق تماما الصهاينه ركبوا الشعب العربى ودلدلوا رجليهم
يل كريم اقتصاد مصر كله اصبح فى ايديهم .. شركات النسيج والالتصالات.. وبكرة تكتشف ان احمد عز تبعهم.. ولو اننا عارفين ده مندلوقتى
والاعلام ده هما اللى بادعينه وهما اللى عارفين يثبتونا بيه
اللى مجنن اهلى ان شعبنا مستسلم قوى وعجباه الحكاية وعاجبه الوضع المنحط اللى اصبح فيه
لكن لازم انا وانت واللى زينا نفضل صاحيين ونبقى فاهمين ونفهم الناس اللى حوالينا...ده طبعا بعد من شد اللحاف ...
ثانيا:
مى
مدونتك رائعه وهستنى زيارتك
اوك

AbdElRaHmaN Ayyash said...

:) كانت الرسالة مبعوته لي معاكي
و شفتها
و محبيتش ارد عليها
لأني احبطت اوي
اكتشفت اد ايه احنا اغبيا
!!!
بس اكيد الموضوع مش هيستمر كده
اكيد

كراكيب عادل said...

انا حسيت انها فيها حاجة

بس بجد مفروض مفيش حد يرد غير لما يفهم علي الاقل هو بيضغط علي اية

فكرتيني بنكتة بس مش عايز اقولها هنا


هضحك عليها لوحدي

Doaa Ebrahim Aaql said...

استغلالاً لنزعتنا الدينية
وجهلنا وانسياقنا
وراء ثقافة القطيع

فيها إيه
لما نفهم الأول
الرسالة
عشان نعرف إحنا بنبعت إيه
وبنصوّت لإيه

****


تحياتى لكِ

محمد العدوي said...

من مدة قريت موضوع على منتدى بعنوان : يخبرون تخلفنا .. فننجح .


مع أن جمهور النت دا من المتعلمين والمثقثفين والعالم اللي بتفهم ...


و عجبي .

Anonymous said...

ببساطة دة لان الواحد مننا يعمل فيها مثقف
وهو من جواه لسة الحمية المندفعة
واخر حاجة بيستخدمها في التفكير هي عقله
اتمنى الرسالة تكون فعلا وصلت

أحمد سلامــة said...

معرش ليه بتخنق من الفيس بوك ده لله في لله
ومش برد على اي حاجة فيه
اهو غلاسة كده
بس هوه في من ده كتير ومتعودتش غير اني اكذب وخوفي الحقيقي من الوقوع في رسالة واحده نادرة ليست لعبة كالعادة
ولا استجيب

سلامي اليكما

تــسنيـم said...

:)
حلو أووي انك تنشريها هنا علشان نفوق شوية وكريم عنده حق


.................................

أنا رنيتلك النهاردة :) طبعا معرفتيش الرقم

dandana said...

السيد شبل..

مش مهم مين اللى ورا الموضوع بقى..لاننا بقينا وراه برضو...

احيانا بحس انه لازم نبقى ورا وخلاص

شكرا على رايك فى ابنتى ..واكيد ليا زيارة عندك..


عبدالرحمن...
تفتكر...!
يارب
يارب


عادل..
طب ماتخلينا نضحك..
بدل مايضحك علينا..


دودو...
المشكلة ان المفروض اننا متعلمين..
دا احنا شباب النت والتكنولوجيا..
ولا ايه..


محمد...
صح..المفروض
شفت انا قولت ايه لدودو..

عجبى عجبين


مصطفى...
ياريت فعلا توصل..لأى حد..ولكل حد


احمد سلامة..
تصدق انا كمان بقيت بتخنق منه..بس اليوم اللى فتحته فيه من شهر..لاقيتها..وماعرفتش اسكت


تسنيمتى..
يارب نفوق..وناخد بالنا شوية..
شوية بس

اكيدعنده حق..

اه..انا فعلا افتكرت دلوقت ان فيه رقم غريب رنلى..المشكلة انه اتحذف دلوقتى..اتفضلى رنيلى تانى

Anonymous said...

نقدر نقول..... الشيطان )قصدى(اليهود
شاطر....وده طبعا غلط...لأن بصراحة أحنا اللى بلده
وأتذكر ما قاله الله لسيدنا داود:ياداودطهر بيتى
فقال داود : وأى بيت على الأرض لك يارب
قال الله ياداود بيتى هوه قلبك
فقال داود وكيف أطهره يارب ؟؟؟؟
قال الله:أشعل به نارا" تأكل كل شىء أياي
وكما قال الامام الشهيد ان شاء الله حسن البنا...أقيموا دولة الله فى قلوبكم تقم على أرضكم.... لذلك فأن الحل ليس بيدى غيرنا ولكنه فى يدينا....فقد ربى النبى رجالا" زرعوا لنا فأكلنا ... ولابد أن نزرع كى يأكل من بعدنا