Sunday, October 21, 2007

تاج...على عينى وعلى راسى


تاج ممتع من يوتا...



لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
اصل المشكلة ان كل عصر من عصور مصر لا يخلو من الظلم...طبيعى ..لان فى حاكم ومدام فيه حاكم وحكم يبقى فيه اسبداد وظلم بشكل او بأخر

يمكن احب اعيش فى العصر اللى بدأ الاسلام يدخل مصر فيه على يد عمرو بن العاص




اول اولويه فى حياتك عيلتك ولا شغلك ولا اصحابك؟
عيلتى



اكتر حاجه بتحبها فى رمضان؟
روحانياته..وجو الايمان العالى اللى بيبقى مخيم على الناس..وجوا قلوبهم...

وان الكل بيتقى ربنا شوية ..

مافيش معاكسات

مافيش سجاير

احيانا..مافيش خناق

مافيش شتيمة...احيانا برضو


وبحب ختامة القران




اوصف ليا اجمل فطار ممكن تفطره ؟

بما ان رمضان خلص....

يبقى هاتكلم عن الفطار العادى...

واحسن فطار هو مج النسكافيه




انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

انا مش هاكون عادلة مية فى المية....لان اصلا مافيش حاجة كاملة..الكمال لله وحده

بس انا عارفة انى هاحاول اكون كدا..هاحاول اعدل...هاحاول اختار الناس اللى حواليا صح...هاحاول اثق فى الناس بس من غير ما اتخلى عن حرصى....

واكيد بما انى مسلمة..هارجع للسنة والقران..وطريقة حكم الرسول وخلفائه





اللى بيبوظ الحكام .. نفسهم؟ ولا الشعب؟ ولا الحاشيه المقربه؟

كلهم....بس اعتقد ان البداية بتكون من الحكام...


الناس فى الاول وفى الاخر محكومة....يعنى ممكن تسيطر عليها بشوية قوانين واعراف

(زى ماهو حاصل معانا كدا دلوقت..وبالقوى كمان)


لو الحاشية هى اللى فاسدة وهى السبب..برضو يبقى الحاكم يتحمل المسؤلية..لانه هو اللى اختارهم..وهو اللى قربهم من الحكم...وهو اللى سابلهم الحبل ع الغارب





مين أكتر اعلامي مصري بتحترمه؟

منى الشاذلى

مثقفة...واعية...محترمة...حيادية...ومتحدثة ماهرة جدا




قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟

لسا....بس قريت تدوينة عنه او مقال..مش فاكرة...

هاحاول اوصله واقراه




لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

عازقة موسيقى

بيانو تحديدا





ايه تانى بلد تتمنى تعيش فيها بعد مصر؟

الامارات




اوصف ليا ترتيبات اجمل فرح ؟؟
ستايج صغير....عليه كوشة رقيقة...مليانو ورود الدايزى البيضا والورد البلدى الاحمر

عريس وعروسة تحس انهم بيحبو بعض حتى لو انت اول مرة تشوفهم

معازيم من الاصحاب والقرايب...


نظرة حنون من والدى العروسة اليها

ونظرة فخورة من والدى العريس اليه


نسمات هواء رقيقة....

موسيقى رايقة وهادية(بلاش العنب..و أو أو أو...والذى منه)



وكل دا فى مكان مفتوح بيطل على شط البحر مباشرة ..وياريت ساعة الغروب....وف يوم 14 من الشهر الهجرى....




بتراعي كلام الناس والقيل والقال؟ لو اه اولا قوللي ليه؟

براعى كلام الناس ..اه

بس الناس القريبة منى واللى بتقولى فى مصلحتى...

ومع ذلك برضو باخد من الكلام اللى يناسبنى ويناسب طريقتى فى التفكير والحياة


انا طريقى غير تقليدية شوية فى التفكير ومختلفة...يعنى ممكن اخرج عن السرب كتير..من غير ما يهمنى حد

دا غير انى بمر بتغيرات كتيرة فى حياتى...بتخلينى دايما اخد ماخدش بكل الكلام اللى بيتقال لى

بس انا كدا مستريحة

ودا المهم


القيل والقال...كأنه ماتقلش اصلأ

لان اللى ماعندوش شجاعة يقولى انتقاده ليا فى وشى...يبقى مايستاهلش انى انتبه لاى كلمة بيقولها



صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

فالكو فى بيتكو ...ليه السيرة الوحشة دى بس


هو صحيح ماعنديش كاميرا ديجيتال....

والجهاز الايام دى بيتصلح..بس الامل موجود


انما كله يختفى...!

لا لا لا لالا لا لا لا

قلبى مايستحملش



السعاده هى؟

مابحبش ادى مسميات للمشاعر

زى اللى يقولك الحب هو..( برمرم بررم)....والمراة ماعرفش ايه..والرجل عمل ايه


سيب اللى تحسه تحسه من غير ماتحاول تعرفه..لانه هايبقى شئ جامد مالوش طعم

انما حيرتك فى انك تفسره..بتدليه لذة اكتر

حد سمع فيلم ويل سميث

pursuiet of happynees



عندك أمل ؟؟ أسبابك ؟

كبييييييييييييييييييييييييييير

ولو من غير اسباب

المهم انه موجود




لما تحب تهرب من كل شئ بتروح فين؟
بنام....لان الاماكن كلها بتضيق ساعتها اوى

مافيش غير اللا وعى




امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

فى شهر سبتمبر اللى فات

لما كملت 20 سنة

وماكنتش مصدقة

قعدت احسبهم بالايام والاسابيع والدقايق

عملت كشف حساب لنفسى..


لاقيتنى ضحكت وزعلت...فرحت واتألمت...حبيت..وكرهت..واتعلمت حاجات جديدة..وعملت حاجات كتيرة مفيدة وعبيطة...سافرت ورجعت وشوفت ناس حلوة وأكتشفت ان فيه ناس كتير وحشة

انخدعت ..وكنت نبيهة احيانا


اتعرفت على عمر خيرت وفيروز ونجاة ومنير ونيكوس وعمر فاروق


وقريت لهيكل وانيس منصور وناس كتيير ماكنت اعرفهم جداد وقدام


عملت كل الحاجات دى ..

اومال سيبت ايه للسنين اللى جاية

انا بجد كبرت اوى


ماحدش بقى عنده عريس





لما بتعمل عمل خيرى بيكون ايه هو دافعك الاول؟

انى مستريحة والحمد لله...بس شايفة ناس كتير مش زيى

يعنى لما يكون الراجل اللى واقف طول النهار قدام عربية الترمس هو دا مصدر دخله الوحيد

ولا اللى بيمسح جذم فى الشوارع


طب على الاقل دول قادرين يعملو حاجة..لول قليلة

فما بالنا بقى باللى مش قادر خالص




بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟

اكيد مابشربش...وشعورى بيبقى شعور بالقرف من اى حد بيشرب ومن السيجارة الحقيرة اللى بتحكمه...

احيانا بيصعب عليا..بس برجع الومه لان هو اللى اختار م الاول


اه شوفت ست بتشرب سجاير




تعرف ايدك اليمين من الشمال ازاي؟

ماحدش بقى ممكن يصدق انى بتلخبط جدا بين الشمال واليمين

وكذا مرة اركب تاكسى ويسألنى يمين ولا شمال اقوله عكس اللى انا عايزاه خالص

ماعرفش بجد ايه الجنان اللى انا فيه دا

زهايمر ولا ايه؟





ايه اكتر آله موسيقية بتحبها؟

العود

البيانو

القانون

الناى


بمناسبة الكلام عن الناى...خدو دى هدية منى ليكوا

خصوصا الست يوتا اللى دبستنى فى التاج

دا بقى اللى بيقولو عليه الناى التركى


فى رأيك ليه الذوق والنخوه اتعدموا؟

الناس مش لاقية قوت يومها...

ومسألة الاخلاق دى استحالة تلاقيها فى حد باله طول اليوم مشغول ازاى يطلع القرش من اصغر خرم فى الدنيا

ومع ذلك انا ضد انعدموا دى..لسا موجودين..بنسبة قليلة اه... بس موجودين

دور ع الناس...فى قلوب الناس



ايه الحاجه اللى لو حصلتلك تبقى سعيد قوى؟؟؟

انى احقق حلمى




تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

كام عمارة


العقارات الايام دى سوقها منتعش جدا....

يعنى ممكن الكام عمارة دول يعملولى حاجات كتير سواء بيعتهم او اجرتهم


شوية فلوس بس..احقق بيهم حلمى..وبعدين خدوهم تانى



البحر و لا النيل؟

ولا دا ولا دا

النهر




مركب و لا طياره؟؟.

مركب

ولو انى متعقدة من ساعة مركب السلام


قال سلام قال



مجنون و لا عاقل؟؟

سألت نفسى كتير...مارستش يوم على بر




تقرأ كتاب و لا تتفرج عليه فيلم؟

فى الغالب...هاقرأ كتاب

بس مايمنعش انى اتفرج عليه فيلم ..بس بعد ما اقراه



بتمرر التاج لمين؟؟؟







قبلاتى
******************************
تحديث
بمرر التاج لمعاذ...مزمز
عشان بس نفسيته والجرح اللى ف قلبه

23 شاركونى عالمى:

مُزمُز said...

أول تعليق أهو

عشان متقوليش كسلان بس

ولو إنك مفتكرتينيش وممررتيليش التاج

أووووكي أوكي

ميرسي جدا

واوعي تفكري تكتبي اسمي بقى عشان زعلت وكده

برضه مش هسامحك

اللي انجرح خلاص عمره ما هيتداوى

باي باي

Lapa said...

قمة عالمية البرتغا الكاتب cristovao دي اغيار.

وهو ، أيضا ، وترجمت الى اللغة البرتغاليه ثروه الامم من آدم سميث.

وقد منح العديد من الجوائز.

لا تنسوا اسم هذا الكاتب العظيم ، يمكنك الاستماع اليه قريبا.

اشكركم على انفاق الوقت في الثقافة العالمية.

شكرا للزيارة

dandana said...

حضرتك يا استاذ موزة ...اخر تاج ماجاوبتش عليه...
انا شاكة اصلا ان يكون موضوع غيابك اللى فات دا عشان بتتهرب من التاج بتاعى
(وش مطلع لسانه)

بس اعتبر ان التاج اتمررلك خلاص

و بعدين اى اى جرح فى الدنيا
شوية ميكروكروم وشاشة وقطنة ..هايبقى تماااااااااااام

ولا يهمك

لابا...
شكرا ليك انت

مدحت محمد said...

ردودك كلها غامضة

تــسنيـم said...

ومبسوطة أوي ومختاراني أول واحدة
الله يسامحك

ما تستنيهوش قريب قدامه كتييييييير على ما أعمله

moony said...

زى ماكنت بقول عليكى من اللى كنت بقراهولك قبل كده.. حكيمة.. رقيقة ..شخصية "مليانة"مش فارغة
مليانة بكل معنى الكلمة..يعنى ماغك ليانة.. وشخصيتك مليانة قيمة وخبرة وافكار ومشاعر ..بس ايه ده؟؟ مررتيلى تاج؟؟ لا مش ممكن اول مرة تحصلى .. ميرسى يا دندون وان شاء الله ارد عليه فى اققرب فرصة.. تحياتى الجمة

أحمد سلامــة said...

رجع من تاني طوفان التاجات يلفلف عالمدونات
كل ما ادخل بلوج الاقيه
امري لله
انا بس حبيت اقول كل سنة وانتي طيبة وهي متاخرة كده وزي الفل :)
اللينكات اللي عندك عجبتني جدا جدا
--------------------------------
كويس انك افتكرتي منى الشاذلي
تقريبا اول حد في التاج ده يقابلني افتكرها

dandana said...

ضحى...
مع انى بحب الغموض اصلا..
وبشوف انه جذاب ...
بس هو فين بالظبط الغموض فى اللى انا قولته...
ياريت تعرفينى...
ونورتينى



تسنيمتى..
اول واحدة دى بس زيادة غلاوة وبعدين يا قمر لو انتى مشغولة ولا يهمك
اعتبرى انك جاوبتيه خلاص

قبلاتى


موونى...
بجد حرجتينى بكل كلامك الحلو فى حقى..
ياريت ابقى نصه حتى فعلا
بالنسبة للتاجات
ولا يهمك..
كل يوم من ده


احمد سلامة
كل سنة وانت اطيب وهى متأخرة وحلوة كده
اللينكات كلها تحت امرك يافندم..
وادينا بنحاول

منى الشاذلى بجد ماينفعش تتنسى...انا رأيى كدا
نورتنى

YOTTA said...

dandana
أو البشمهنذة ميوية
أيوة كده التاج منور المدونة
طبعا شان انا اللى باعتاه
هههههههه

بس طلعنا شبه بعض ف كذا حاجة

وأدينى اطمنت انى هلاقى حد يونسنى ف الامارات
أوعى تروحى من غيرى
:)

أما بالنسبة بأه للهدية
فبجد فرحتنى أوى
أنا أصلى أحلى هدية تجيلى غنوة أو موسيقى
بحب اسمع أى موسيقى جديدة
اكتشفت قريب ان الموسيقى التركية فيها حاجات كتير حلوة

:)

YOTTA said...

أه نسيت اقولك
The pursuit of happyness
عندى من مان ع الكمبيوتر ومكسلة اشوفة

بس فكرتينى بأه
هشوفة واقولك رأيى
:)

مُزمُز said...

حضرتك يا استاذ موزة ...اخر تاج ماجاوبتش عليه...
انا شاكة اصلا ان يكون موضوع غيابك اللى فات دا عشان بتتهرب من التاج بتاعى
(وش مطلع لسانه)



متحاوليش تبرريلي اللي حصل
زي ما قلتلك اللي انكسر عمره ما هيتصلح

وفرق كبير بين إنك تفتكريني من نفسك وبين إنك تحرجي فتحطيني في الأسماء

وعموما يا ستي
ربنا مخذلنيش
وجالي تاج من صديق آخر
ومن غير ما أطلب
ومن غير ما أتوقع أصلا

بس كده

(وش مطلع لسانه برضه)

Oma said...

taag 3asl awi
w enty a3sal..sha5sya keda shdida msh ay 7ad..w 7asa enk ra2i2a
rdodak sharbat bgd..belzabt bey7sl m3aya mawdo3 el yemen w shemal da m3 el taxi..howa akid zhaymr 3ndk shak fe da :)))))))

dandana said...

يوتا...
القلوب عند بعضها...
اكيد لازم نطلع شبه بعض فى حاجات

بخصوص الميوزيك ..
اى حاجة جديدة ...هابعتهالك..ولا يهمك...

وكمان اوعى اوعى ماتشوفيش فيلم ويل سميث...
دا رائع...
بكل المقاييس

مستنية رايك فيه


معاذ...
على فكرة بجد انا بصدق بسرعة
يعنى انا دلوقت مصدقة انك واخد الموضوع جد
وانك زعلان
وعلى فكرة برضو انا مش محرجة عشان كدا ضفت اسمك...بس عشان مابحبش حد يزعل منى

وكأنك بتقولى ان اضافتى ليك مش لازماك

مش عارفة


اوما..
مرسى يا قمر على كلامك
حاولت بس ابقى خفيفة على اللى بيقرا اجاباتى ...
هو فعلا زهايمر..انا يقينا عارفة كدا...
نورتينى اوى

YOTTA said...

على فكرة
شفت الفيلم امبارح
شفتى عصر السرعة
عجبنى أوى
بس فيه حاجة يعنى
هو بيتكلم عن معنى السعادة
وان الانسان لازم يكون عنده هدف ويسعى عشان يحققة
ساعتها هيوصل للسعادة
لكن
كان ايه هدفة
فلوس
عايز يشتغل عشان يجيب فلوس ويعيش هو وابنه
يعنى ننتهى برضو لأن السعادة فى المال
؟؟؟
أو يمكن انا فهمت الفيلم غلط
!!!
المهم انتى عاملة ايه؟

dandana said...

لا بجد عصر سريع موت

وانتى اسرع
...
طيب انتى بتقولى حلو...صح...دا مبدأيا كويس

بس انتى اتأملتى معايا اسم الفيلم

معناه السعى وراء السعادة...وهو نفسه كان بيول فى اول الفيلم انه مقتنع بمقولة احد الرؤساء اللى نصها فى الدستور...بانه اختار تعبير السعى وراء السعادة..مش الوصول..لان السعادة شئ غير قابل للوصول...ولا هاتببقى شئ ملموس وممكن الاحتفاظ بيه...انما عشان هى شعور بيروح ويجى للأنسان وماينفعش يحافظ عليه دايما..فهايبقى فى حالة سعى وراءه


بالنسبة له...ولظروفه_ولاحظى ظروفه لان معنى السعادة بيختلف من شخص لاخر بحسب طريقة تفكيره والظروف المحيطة بيه_كانت السعادة انه يضمن مستقبل كويس لأولاده...افتكرى كدا كان قال ايه فى اول الفيلم...قال ان باباه سابه من وهو صغير وأنه طول عمره ماشافوش بسبب ان والده دا ماكنش عارف يبقى اب واستسلم..عشان كدا هو كبر وفكرة واحدة فى دماغه...ان لما اولاده يكبروا يبقوا عارفين ابوهم مين...وبالنسبة لظروف مجتمع امريكى زى اللى هو نشأ فيه...المادة هى اهم الوسائل والغايات...وخصوصا لما تبقى مع حد عارف قيمتها زيه...

وكمان من اكبر الاسباب اللى دفعته انه يفكر فى ذيادة دخله..هى ان مراته اتخلت عنه وفى نفس الوقت هو اصلا انه مايتخلاش عن ابنه..مع انه مش قادر يدفعله مصاريف الحضانه ولا ايجار السكن...

واعتقد اننا كلنا بندور على فرصة احسن يعنى مش معقولة لو جاتلك فرصة شغل فى حتة احسن من اللى انت فيها..هاترفضى...مش عشان انتى مادية بس عشان بتطمحى لحاجة احسن...ودى من مميزات الانسان...
وهو كان كدا...كان طموح...وفى نفس الوقت مصر انه يبفى حاجة فى حياة ابنه...ان ابنه لما يكبر..يلاقى والده جنبه...ويلاقيه حاجة كبيرة...يقتدى بيها...


يعنى هو حقق سعادته من خلال المال واللى هو كان غاية لفترة ما..وبعدين بقى وسيلة..ومن خلال قربه من ابنه...


شوفتى فى الفيلم لما الولد قاله
papa..u r agood papa
خدى بالك ان من بداية الكلمة دى...هو قعد واشتغل على الجهاز اللى كان هايبيعه وبايظ..وصلحه...واخد تمنه عشان يقدر يكمل لغاية ما تدريباته تنتهى


بس...هو دا اللى انا اقتنعت بيه من الفيلم

دا غير طبعا علاقته بابنه الرائعة

***********
بالنسبة ليا بقى
انا تمام...عاملة اندومى النهاردة...تاخدى حتة

مُزمُز said...

إيه يا بنتي ده؟
إنت شكلك كده إنتي اللي زعلانة
أنا بهزر طبعا يعني
مش هازعل يعني عشان ممرتيليش تاج
ده أنا حتى بكسل أجاوب من زمان

أنا بس بهرج

بهرررررررررج

بهرااااااااااااااااااااح

أوكي؟
:)

أوكي

بس عموما

اللي انكسر عمره ما هيتصلح
(بهزر وبعد كده هاحطلك الهزار بين قوسين)
:)

islam yusuf said...

أنا كمان بموت فى حاجة اسمها محمد المخزنجى
قريتى أوتار الماء


مدونتك جميلة أوى

Anonymous said...

بتتكلمي عن ترتيبات أجمل فرح
بس دة مش فرح
دي حاجة زي الحلم

Anonymous said...

عجبنى قوى اجابتك عن السعاده فعلا السعاده مالهاش مسميات ولا تعريف لاختلافها من فرد للاخر
واجابه النخوه والذوق اوافقك الراى فيها بالثلث
ويبقى البسى ساعه فى ايدك الشمال تعرفى الفرق

dandana said...

مزمز..
مانا عارفة اك بتهرج يابنى..بس كمان ماقدرش الغى احتمال انك ممك تكو بتتكلم بجد...

بس خلاص
كله تمام
******************

اسلام...
لا بصراحة لسا


بس نورتنى دا
**************

مصطفى...
صح..هو بالنسبة لى زى الحلم...
حلم جميل فى رايى
*************
رئيس جمهورية نفسك...

جميل اننا نبقى متفقي فى حاجة...
وم اول زيارة..

شكرا على نصيحة الساعة..هاحاول اجربها

محمد العدوي said...

الامارات

قولي الهند .. الصين .. نيكاراجوا .. حاجة كدة راسخة في تاريخ الدنيا ..


جميل يا مي .

Ahmed Al-Sabbagh said...

تمت أضافة مدونتك لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

dandana said...

محمد العدوى...

ممممم..مش عارفة بس التاريخ احيانا بيتناقض مع الواقع الحالى...
زينا كدا

عشان كدا انا اخترت اللى انا شايفاه كويس حاليا

نورت بالزيارات المتباعدة القريبة دى..

احمد الصباغ..
شكرا يا سيدى...

انا عن نفسى بدعم الفكرة

نورتنى