Saturday, May 26, 2007

صغيرتى





القمر اللى فى الصور دى ...ندى....ندى اختى الصغيرة...
بصراحة ماكنتش عارفة المفروض اكتب عنها ايه...مع انى عايزة اكتب عنها مجلد كامل...
بس دايما الناس القريبين من روحك ماتقدرش تكتب عنهم بسهولة...
الكلام مش هايوصف احساسك بيهم..فما بالك بقى بروحك نفسها....
بس ماكنش ينفع عيد ميلادها يبقى الشهر دا ..وماحتفلش بيها على طريقتى...


ندى ...او ندوش زى مابحب اقولها....دخلت حياتناززوحياتى انا خصوصا ..من اربع سنين
اربع سنين ..هما الاكثر اثارة فى بيتنا...واللى جاى اكتر....

من اليوم الاول...لما ماما رجعت من المستشفى بالسلامة...واديتنى اشيلها بين اديا....
كنت....كنت ببصلها وانا مبهورة...قد ايه كانت جميلة...هادية اوى...صغنونة اوى...
ماكنتش متخيلة ان فعلا ليا اخت اصغر منى ب 16 سنة....

حاجة كدا زى حتة البسكوتة...كنت بفضل بالساعات اراقبها...اشوفها بتتحرك ازاى ..بتعمل اصوات الاطفال ازاى...ماكنتش اول بايبى اشوفه...بس كانت حالة خاصة بالتأكيد....

فى يوم...وبعد ما مر على وجودها معانا 4 شعور...كنت نايمة جنبها براقبها كالمعتاد...
فجأة لاقيتها بترفع رجليها...وهوووب.ززراحت قالبة نفسها على بطنها....ياااربى...
يخرب عقلك ياندوش عملتيها ازاى دى...
ناديت ماما...وقولتلها..(تعالى شوفى بنتك بتقعد مع مين بيعلمها الحركات الخطرة دى(

بدأت تكبر...وتملا البيت بصوتها..وبعدين حركتها...وفجأة لاقيتها بتمشى....
فجأة لاقيتها بتجرى قدامى ..وبتجرى ورايا....وفجأة لاقيت عندها سنتين...

ماعرفش ازاى عدوا ..بس عدوا....المشكلة انها كانت هادية اوى فى السنتين دول...
بس كان لازم نعرف ان دا الهدوء اللى بيسبق العاصفة ...

فى يوم كنت داخلة من برة ..وجايبالها بسكوت وشوكولاتات...والذى منه...
خدت الحاجة ...اكلتها..من غير حتى شكرا...وخلاص الموضوع اتنسى ....
بعد شوية لاقيتها جاية عليا جرى..حضنت رجلى جاامد...وقالتلى
((ماماتى...انتى ماما صغنونة((
يااااااااااااااه...ماكنتش مصدقة....احساس غريب اوى ..جميل اوى ...

صحيح انا كنت متولية جزء من المسؤلية مع ماما...فى الاول غصب..وبعدبن حب....
صحيح كنت بأكلها...والعب معاها...واغيرلها هدومها...وانيمها...واحكيلها حواديت...
حاجت كلها بسيطة ..بس بتسعدنى ...واعتقد بتسعدها...
بس عمرى ماتخيلت انها ممكن تحس بكل دا...فى سنها دا..وتيجى وتعتبرنى زى ماما...

طبعا موضوع الحواديت دا انا ندمت عليه بعدين لأنى لحد دلوقت مطلوب منى احكى 3 حواديت مختلفة كل يوم وكلهم يكونو عن الغزالة ...بس نعمل ايه...انا اللى جبته لنفسى...

مع انى دلوقتى بحاول اعلمها حاجات كتير صعبة بالنسبة ليها...لانها اول مرة...
ومع انى برخم كتير...وبزعقلها لما بتعمل حاجة غلط...بس انا عارفة من جوايا ..وجواها ..انها لسا بتحبنى زى الاول....
هو الموضوع ببساطة رابط عملته انا وهى مابينا..حاجة خاصة ...جميلة...ماينفعش تتأثر بحاجة...

بتدلعنى تقولى يا ميوتة...ولما تبقى عايزة منى حاجة يا ميوتى..لما تبقى مضايقة منى بتقولى يا مى ...واوقات حاجات تانية ماينفعش تتكتب عشان البرستيج بتاعى...

ندوش بالنسبة لى ملهمة ...ليها فضل كبير فى حاجات كتير جربتها لأول مرة معاها...وببرائتها بتدينى افكار لحاجات كتير ....

ندى..ماينفعش اقول عليها توأم روحى ...لأنها روحى نفسها

ندوش يا حبيبتى ...كل سنة وانتى دايما منورة حياتنا...
كل سنة وانتى روح البيت....
كل سنة وانتى جميلة وشقية...
كل سنة وانتى الذ اخت فى الدنيا...
كل سنة وانتى حبيبتى....>

20 شاركونى عالمى:

شيماء الجيزى said...

الللللللللللله يا مى
الله بجد كلامك عن اختك اثر فيا اوى

يا بختها بيكى ويا بختك بيها
اد ايه انتى حساسه
لدرجة انك تسميها صغيرتك
عارفه حسيت احساسك ده مع اخويا الصغير
لانى تقريبا الى مربياه
تسلمى يا اجمل بنت فى الدنيا
وكل سنه وندى بخير وبسعاده وصحه

بوسيهالى يا مى
تحياتى يا جميله

dandana said...

اذا كان على البوس ...فهى زهقت ...بس عشان خاطرك....
نبوسها تانى ...

وبوسة كمان ليكى عشان انتى عسل...
ربنا يخليلك اخوكى ...
كل سنة وانتى اطيب

نقطة مية said...

مدونة رقيقة و جميلة و اسمها حلو...
اما عن البوست فربنا يخليكم لبعض

إبـراهيم ... said...

يااا حبيبتي يااا نووودي ياااا قمــــر
ربنا يخليكي يا مي ، ويخليها لك ، أخيييرًا لقيت فتـاة أحلاااامي ، بستسمحك آآآخد الألبون بتاعها ، عشان يوم الفرح ...


ربنا يخليكي ليا يا نووودي يااا قمـــر

وخلااااص يا مي ، قوليلها من دلوقتي خطيبها إبراهيم ... و اعقدي اذكري لها ف محاسني ، وتاني مـرة تجيبيها معاكي ، ولا أقول لك أجي لها أنا لغااااية عندها ... الجميل يُأتى له :) ...


المهم ، خليها تقول لي خطبتك نفسي ، ولا أي حاااجة ، لحسن أنا بجد همووووت فيها !!! متت تقريبًا
******************
بالنوووسبا لك إنتي بقى ، فكرتيني بأخويا عبد الرحمن ، كبر قبل ما أعمل المدونة بكثييييييير ، بس كان حكااااية كده من 5 سنين ولا 10 سنين ف الحقيقة ، لما كان صغنن ، وجي على شوووقة بعد 4 بنات ، وكان هوا فاكهتنا المفضلة يااااااااااه

كانت أيام ،،،، الواد ده كبر دلوقتي ، وبقى راجل البيت ف غيابي !!!

ربنا يخليكي يا ميوية

بوست تحفـة ، وربنا يخليلي ندى القمـر
وبوسيها لي من كل حتة ، وإيااااكي تزعليها ، حاكم أنا عارف أخت كبيرة متـسـلطـــة

بحبك يااااااا نووودي

Reemo said...

ما شااااااااااء الله
ايه القمر ده يا مى
ماشاء الله تانى
يابنتى بجد خافى عليها من الحسد
بجد جميله وطعمه أوى
ربنا يحفظها يارب
وتكبر كده وتبقى عروسه زى القمر
-------
خلى بالك منها كتير
واوعى تزعليها ولا تزعقلها
وبوسيهالى وقوليها ريم بتسلم عليكى وبتقولك انتى بنوته طعمه وجميله أوى
-------
ربنا يحفظها يارب
محبتى

lockash أحمد تمام said...

كل سنة وهي طيبه و ربنا يخليها لكل الي بيحبوها..
بس ايه الغيبه الطويله دي. بتعبرينا مرة كل شهر.. يعني يهمنا اننا نطمن عليكي و نقرالك من فتره للتانيه ماتبقيش تتأخري علينا كده..

Anonymous said...

انا اول مرة اجي عندك وجيت من بلوجر لوكاش
بس كنت سعيدة جدا بحفلة عيد الميلاد اللي جيت ولقيتها
بس اقلك حاجة..زي مااختك ماشاء الله عسولة وانا حبيتها من كلامك ومن البوم الصور
لقيتك برضه يامي...باين عليكي رقيقة جدا وان شاء الله تكوني في يوم ام حنينة وطيبة
ولان ده فيكي ندي حسته وقالته ليكي لان براءة الاطفال تخليهم يحسوا بالشيء الحقيقي الصافي ويعبروا عنه
لانهم مازالوا انقياء دون شوائب الدنيا
ربنا يخليكم لبعض ويحميها

سعيد جدا باني اتعرفت ع البلوجر العسول ده

كراكيب عادل said...

ربنا يخليكم لبعض

انا اكتر حاجة عجبتني الاسماء الي بتندة بيها علي حسب الحالة

واتخيلت شكلها لما بتندة باسمك بس مي

يعني كدة زعلانة ؟

تــسنيـم said...

قمرايا يا ميوي وفيها كتييييييييييير منك

ربنا يخليهالكم يا رب

Anonymous said...

يا خراشي على الجمال

مش ممكن يا مي بجد بجد بجد عسلللللل

مالهاش حل فعلا

تتاكل بصراحة

أنا دخلت الصفحة دي أربع مرات عشان أتفرج عليها ومقريتش المكتوب لسه

أبهجتني أوي الصور دي

لأ تكسبي طبعا

أو يمكن أنا أصلا بحب البنات الصغننة الكتكوتة دي أكتر من الولاد بكتير عشان كده مفيش مقارنة

بس دي شكلها هتطلع مكلبظة مش هينفع كده لازم تظبطيها قبل ما تدخل الكي جي أنا بقوللك أهو الواد أخويا رشيق وجسمه مسلوع فمش عايزين فضايح مش معقولة يعني يمشي جنبها بعد الجواز وهي تكون أتخن منه فاهمة أنا بقوللك أهو:)

ملحوظة بقى لإبراهيم معايا

معلش يا عم البت دي اتخطبت خلاص لعلي أخويا من قبلك وفاتك الدور مالناش دعوة يا عم:))

وبعدين احنا أسرة ريفية إخوانية محافظة لا نسمح بأن حد يتكلم على خطيبة بنتنا أي كلام حب أو يقول فتاة أحلامي ومش عارف إيه لأ لأ دي فيها دم دي

كله إلا الشرف
وأحلى من الشرف مفيش
هع هع هع هع

معاذ

momken said...

كل سنه وهى طيبه وربنا يخليكوا لبعض وعقبال ميه سنه يا ندوشه

شيمـــــاء said...

بسم الله ما شاء الله
كل سنة و هى طيبة
وانت احلى ماما صغنونة فى دنيتها
بكره لما تكبروا هتحسى بحلاوة العلاقة دى اكتر واكتر
:)

.:.-=- ELGaZaLy-=-.:. said...

بسم الله ما شاء الله دى سكر خالص

ربنا يحفظهالك يارب واحساسك بيها جميل اوى

بجد ربنا يخليهالك يارب

قصاقيص said...

ماشاء الله
ندوش زي القمر
ربنا يخليهالكم
صدقيني فعلا لما بنتكلم عن حد بنحيه اوي بتبقي الكلمات اضعف بكتير من احساسنا
عندما نكتب للاعزاء نصبح حقا لانجيد الانشاء
...............
كل سنة وانتوا سوا وسعدا سوا

سندباد said...

ربنا يخليكم لبعض دايما

Anonymous said...

أنا أول مرة آجي مدونتك دي وهي آخر مرة بس الموضوع ده عجبني جدا جدا جدا

محمد العدوي said...

لولا إبائي ولولا أنني رجل . كنت اتنيلت وعيطت والله ..


كل الود .

dandana said...

شكرا لك اللى رد...
وكل اللى قال لندوش كل سنة وهى طيبة...
كل سنة وكلكوا بخير...

اسة انى مش هاقدر ارد على كل واحد بالاسم...على الاقل دلوقت...

حقيقى مقدرة كلماتكوا...وشاكرة ليها...

كونو سعداء..

Anonymous said...

انا اول مرة ادخل مدونتك و اكتشفت انك رقيقة جدا و حساسة جدا
....
ربنا يخليكم لبعض

dandana said...

نورتنى....
وان شاء الله مش اخر مرة ..صح؟

شكرا على كلامك