Monday, June 27, 2011

تغيير مسار


هو شرط يكون طرف الدنيا هو نهايتها...؟

من ساعة ما قررت انى اغير اسم المدونة دى من شهرين فاتو وانا مقتنعة تماما بالأسم دا..على طرف الدنيا
سمعتها فى اغنية شاب وصبية لأميمة الخليل..اغنية عبقرية وحالة خاصة وحميمية
لكن اول ما سمعتها بتقول وحدُن ع طراف الدنىّ-مش لأول مرة- وفت المزيكا لانى فعلا لاقيت اكتر وصف قريب للى انا كنت بعيشه وقتها ومش عارفة اصنفه

انا كبرت..واتغيرت كتير اوى اوى
ومش عارفة ابدا للأحسن ولا للأوحش
بس اللى اكتشفته بعد حالة من الأرتباك بسبب التغيير دا-لانى بحب الاستقرار اكتر مع انه مش السمة الرئيسية لحياتى-انى خرجت من القوقعة اللى عملتها لنفسى عشان تحمينى
من العالم الصغير اللى رسمت حدوده ودافعت عنه على قد ما قدرت لانى وقتها وجواه..كنت هشة وضعيفة
كنت قابلة للخدش..واحيانا مستعدة لاستقباله بصدر رحب

انا مابقتش عايشة ف دنيتى الخاصة
لاسباب اختيارية..واكتر اجبارية..انا فقدت السيطرة على مسار كل حاجة جوا العالم دا
مابقتش بحكمه لوحدى..ومابقتش بفصله على مزاجى وبس
اتضح لى ان النضج والتقدم فى السن مش معناه ابدا امتلاكك التدريجى لحياتك بكل خيوطها ، لكن هو بالأساس فقدانك التدريجى للمساحة اللى تقدر تحافظ عليها لنفسك وزيادة تدخل كل حاجة/حد ف حياتك..ومن غير قصد..لانها سنة حياة
كان تمن غالى اوى ف مقابل انى اكبر واعقل

ف انتقلت من بؤرة عالمى الخاص الصغير..لطرفه ، وتقمصت الدور الجديد انا قاعدة وحاطة ايدي تحت دقنى فى وضع انتظار وفُرجة ، وماعرفش ابدا اذا كانت الطرف دا النهاية ولا دا مجرد طرف من اطراف كتير ممكن اتفرج منها بزوايا مختلفة
بس ف الغالب..انا مش عايزة اعرف

مش كل الأسئلة تحتمل اجابات..صح..؟.

اقصد...مش كل الأسئلة انا ممكن اتحمل اجاباتها

5 شاركونى عالمى:

Unknown said...

النضج هو الفهم الأشمل للحياة وما يتطلبه هذا الفهم الأشمل من الابتعاد عن الحلقة الضيقة الخاصة تدريجيا حتى يسهل النظر إلى ما حولها والتفاعل معه، أو "السقوط في المقلاة" كما يقول غسان كنفاني

zoom out

الحلم العربي said...

التغيير هو الضريبة اللى بندفعها بعد التجارب اللى بنمر بيها و نكتشف بعد شوية سنين اننا مابقيناش احنا خالص
بس ده الطبيعي
كل يوم قناعاتنا بتتغير و بنقابل ناس كتير
و على فكرة احنا لو ما اتغيرناش يبقى فيه حاجة غلط فينا ، الناس اللى ما بتتغيرش تبقى ماعملتش حاجة علشان كده ما اتغيرتش
يبقى لازم نتعامل مع التغيير بأي شكل بقى :))
تحياتي

m.sobhy1990@gmail.com said...

إيه يا بنوتة الحكمة دي؟

عيشي حياتك وهي هتفاجئك كل شوية وانسي وهم السيطرة الكاملة(Full Control) ده

C'est la vie :)

dandana said...

صح

زوووووم اوت

بالظبط كدا
:)


الحلم العربى
صح برضو
ما الحياة مبنية على التغيير
والا اكيد ماكنش هايبقى لها لازمة
كانت هاتبقى موت
هو بس احيانا بيجى بطرق غريبة وصعبة ومُحيرة..و...و


مو كا
هى ماكنتش سيطرة كاملة
بس فعلا كانت محاولة للوصول لها
بحجة حماية النفس
بس خلاص
آدينى سيبتها اهو
لما نشوف بقى هايحصل ايه

top-fn said...

طبعاً مقدر تمام التقدير احساسكـ بالتغير

والانتقال من حاله لاخري بس اللى عجبني كتير احساسي من كلامك انك مدركه التغير ده وقيمته مهم اننا نعرف حالنا قبل التغير وبعد التغير مهم اننا نقيم نفسنا ونغير من سلوكيتنا للافضل ونشوف القصور فى شخصيتنا ونتغلب عليه وحصر نفسكـ فى دايره انتي تتحكمي فيها ده طبيعي مش هيكون لان فى مؤثرات خارجيه وخارجه عن اردتنا بتأثر لكن برضه ممكن تحطي اهداف عامه تسعي ليها وده لا يتنافي مع انك تخططي لحياتك ولا يتناقد مع انك مش تحطي نفسك فى دايره اتعاملي مع الناس والعالم لكن بوعي مع الحفاظ على نفسك وعلى مبادائك وشوية حظر وكمان رسولنا صلي الله عليه وسلم قال " المسلم الذي يخالط الناس ويصبر على أذاهم أفضل من الذي لا يخالطهم ولا يصبر على أذاهم "
تحياتي وعذراً على الاطاله
فى انتظار كل جديد