Wednesday, June 16, 2010

معقولة يضل قلبى..معلق بالمناطق


الشروق الوحيد اللى برة الأزاز ده


بيفكرنى قد إيه انا مُفتقدة بلكونة بيتنا القديم


وأنها كانت حقيقى براح بالنسبة لبلكونة البيت الجديد اللى زى ماتكون ماكنش معمول حسابها


وفجأة حد قرر انه يعمل اى حاجة..ويلزقها من برة العمارة ويخدعنا ويقول عليها بلكونة


واحنا صدقناه





بلكونتنا القديمة كانت دايما بتدينى مفاجأة..عودتنى انها هى اللى تاخد بالها منى




بلكونتنا الجديدة دى مُثيرة للشفقة بجد..مابحبش اقولها فى وشها انى بكرهها وانها غير جذابة بالمرة


قليل لما بقيت بخرج لها..مافيش بينا لغة حوار مُشتركة خالص





بلكونتنا القديمة كانت ممُيزة..كان لها فيو خاص بيها ،مفتوحة ع الدنيا وواخداها جوا الننى ، وكل أصحابى شاركونى لحظة او اتنين فيها


والقمر ضحك لى وانا جواها..وكانت بتستنى معايا اللى بجيلى فى الحلم عشان وهو معدى يبصلنا بطرف عنيه




بلكونتنا الجديدة..روحها ضعيفة..مسكينة...شبه بلكونات تانية كتير فى العمارة..وفى الشارع


متحجبة بستارة تقيلة وسخيفة ولونها مالوش معنى




بلكونتنا القديمة ولدتنى لدنيا خاصة...لبراح مايتعوضش




بلكونتنا الجديدة ماعندهاش اى ابداع ومخنوقة بمليون بلكونة ضعيفة حواليها
*********
18/6
غيرت اسم البوست
العنوان من اغنية لطيفة..أمن لى بيت

6 شاركونى عالمى:

Unknown said...

تشاركنا الأماكن ذاكرتنا، تحتل فيها الجزء الأكبر حاملة كل التفاصيل الممكنة لإعادة إحياء اللحظات بشجونها وروحها الكامنة هنا
..

وكفاية لما بتلاقيه فاتح دراعه بيناديك ويقول تعالي في حضنى دا انت واحشنى موت

dandana said...

:)

طعمها اللى واحشنى


بمناسبة منير

الجملة اللى انت اخترتها دى بالذات
منير بيقولها بمنتهى العبقرية
ولما بيوصل لــ دا انت واحشنى موت...بحس انه زى مايكون أرتاح..زى مايكون هى دى الكلمة اللى كان عايز يقولها طول الاغنية واخيرا طلعت..عشان كدا بحس انه بيقولها بضحكة واسعة اوى

Unknown said...

:) :)

مُزمُز said...

هو دايما القديم احلى عشان الواحد مع الوقت بينضف الاحداث ويسيبها شاعرية ولطيفة كده تتحب وتتحول لحلم

بس انا الحقيقة برغم حبي الاكبر لبلكونتي القديمة بعترف ان البلكونة الجديدة هنا في بيتي الجديد اجمل واحلى واكثر شاعرية

بس تعملي ايه بقى ف ان القلب بيفضل معلق بالمناطق

Zianour said...

saba7ek balakonat was3a kolha
a7lam we ward

izayek wekol el7agat

elmarh elgayah e7`tari kwyes elbalcona 2abel elsha2a

lessa fi forsa lebalcona zay ma t7ebeeeeeeeee

bossat kitira

Anonymous said...

انا عايز اسأل سؤال واحد بس !!



لـــــــــــــــيه ؟!؟

.......T.......