اللقا التالت : مالوش تفسير

فيه حاجات كتير سيئة بتحصل و مالهاش تفسير..لكن دا مابيمنعهاش ابدا من الحدوث

بعتت له الجملة دى على الموبايل بعد ما قفلوا بصعوبة ، كانت حقيقى بتتدبح جواها

المشكلة الكبيرة فى رأيها مع الحاجات دى بتحصل لما ماياخدش باله انها من غير تفسير ، وانها حصلت بسبب ترتيبات القدر ، ومش لازم ابدا يكون فيه طرف هو المُلام. دا طبعا مش معناه انها هاتقدر تمنع من الشعور المُحبط ، والثقل اللى بتسيبه فى قلبها .

هى شايفة ان الحاجات دى نفسها هى اللى بتكون اصعب فى تخطيها ، ولأنها حاجات استثنائية فى الطبيعة ، ف بتكون متوقعة ان طريقة التعامل معاها

كمان هاتكون استثنائية ، براح الأحتواء هايكون اكبر ، والصبر هايكون نفسه اطول ، يمكن حتى الكلام المعتاد اللى بيخليها تضحك بتلقائية مايكونش له تأثيره المعتاد ،يمكن حتى وحشتينى او بحبك ماتكونش هى الحل ، والمفروض انه مايستغربهاش وقتها . اصل الحاجات احيانا كتيرة بتكون سخيفة لدرجة ان عندها القدرة تكون قُبة من حبة لو تم التعامل معاها بالطريقة الغلط .

بتكون مُصيبة كبيرة اوى بالنسبة لها لما تبدأ تعيط وهو يفضل مش واخد باله ، عشان كدا حاولت على قد ماتقدر ماتعيطش المرة دى ...وفشلت .هى حقيقى محتاجاه يفهم دا .

بتفكر كتير ياترى هى بتطلب شئ مش منطقى..! ... بس هو اللى عودها انها تطلب اللامنطقى وتلاقيه عنده .. إداها امتياز هى ماشافتوش قبل كدا عند اى حد ، وهى-مع انها طول الوقت بتأكد له انها مش هاتستغله استغلال سئ_بتستمتع بيه وبأنها متفردة بسببه .

هو لازم ياخد باله من دا كمان .

اكتشفت فى اللحظة دى انها بعتت له الرسالة ناقصة ..كان لازم تكون : فيه حاجات كتير سيئة بتحصل و مالهاش تفسير..لكن دا مابيمنعهاش ابدا من الحدوث . الفكرة بس اننا نعرف حقيقتها ونتعامل معاها صح